قصة عادية جداً . . . نصف حياة

نجلس فى محطة الترام لا نلوى على شئ ، أخبرها أنّـى جائع، فتقول أنى لا أفعل شئ سوى الأكل والنوم ،

نتضاحك سوياً ثم نذهب لمطعم فاخر .. اسألها عما تريد فتخبرنى أن لا حاجة لها فى الأكل الآن ثم أنها ليست " مفجوعة " مثلى فـفى الحياة ما هو أهم من الأكل ،

نتضاحك ثانيةً ، أحمل طعامى وأدفع مبلغاً ربما يكفى لإطعام أسرة يوماً كاملاً .  

إلى محطة الترام نعود ، نجلس فى ركنٍ وحدنا .. أشرع فى تناول طعامى بشره خنزير أبعدوه عن القمامة لأيامٍ طوال 

تنظر لى بدهشة ثم تضحك طويلاً متسائلة : 

" أحمد ، انت مين علمك الأكل وأنت صغيَّر .. ؟ "  

أخبرها فى لا مبالاة أن لا أحد ,, مات أبى منذ زمن بعيد ، وكان عند أمى ما هو أهم من تعليمى أنا والصغار كيف نأكل .. الأهم وقتها كان أن تجلب لنا الطعام .. ! 

أسكت لوهلة ثم استطرد فى جدية :

" .. كما ترين لم يعلمنى أحد أى شئ .. أنا ربيْتُ نفسى بنفسى " .

تنتابها هستيريا الضحك ، أحاول إقناعها بلا جدوى أن تخفض صوتها قليلاً فالناس حولنا  ..

تخبرنى من بين ضحكاتها أن الشئ الوحيد التى تثق فيه هو آخر جملة قلتها 

ــ يبدو أنك فعلاً ربيْت نفسك بنفسك ، فأنت بلا تربية تقريباً 

ابتسم ولا أبالى بما تقول ،، تنظر فى عينىْ وتخبرنى أنها لن تتركنى لأربى أطفالنا فهى تريدهم أكثر أدباً وتهذيباٍ من أبيهم العربيد الذى أثبت فشله الذريع فى هذا الأمر ، أهز رأسى موافقاً

تشد على يدى وتقرر إطعامى بنفسها .. أوافق .. تقوم بذلك بسعادة طاغية كأنها تطعم صغيرها  

أعلم ولعها الشديد بالأطفال ، لا أذكر أنّا رأينا طفلاً فى شارع فلم تبتسم له ثم تصف لى مدى رقته وبراءة ابتسامته  

،نتحدث طويلاً عن حال البلد، والثورة، وحكم العسكر، والمظاهرات التى شاركنا فى معظمها، والبرادعى، والإخوان والسلفيين وأمريكا .. كل آرائنا متشابهة تقريباً فى هذا المنحى 

نحن مع الثورة ، ولكننا لا نعرف إلى أين تتجه ، ما نعلمه جيداً أنها مستمرة وأنها تواجه حرباً شرسة وغير نظيفة .. وأنها ستنتصر يوماً ما

انتهى من طعامى ، تجمع قاذوراتى ، تضعها فى يدى وتشير إلى أقرب صندوق قمامة 

أقوم متثاقلاً ، أضعها هناك ثم أعود مسرعاً ، أرى ابتسامتها الحنون فى طريق عودتى  

لعلها الآن تقول : .. يا إلهى ، ما هذا الطفل المطيع الذى منحتنى إياه  !!

نتهامس ، ثم نفيق على صوت فرقعة خافتة ، أحد الأشقياء قذف زجاجة مياة غازية ممتلئة فى الهواء ، سقطت على الأرض ثم مرت أمامنا .. أنظر إليه فى ضيق ، فيشير بيده أن لا تغضب ، أومأ له أن لا بأس 

سريعاً يظهر فى المشهد رجلُ طاعن فى السن أشعت أغبر مهلهل الثياب ، محنى الظهر 

يبدو عليه أثر الفقر والعوز ينحنى على الزجاجة ربما بقى فيها شيئاً يسد جوعه فلا يجد 

يخيب أمله ,, فيقف بجانبها يده فارغة، وراء ظهره ,, ورأسه للسماء يشكو جورها 

أتألم لما أرى ، تربت على كتفى 

ـ انظرى ما فعل بنا الاستبداد ، هل استعد القائمين على أمر البلاد والعباد للقاء الله !!

أتذكر أننى إن لم أكن جزء من الحل ، فأنا جزء من المشكلة 

أتحرك ناحية الرجل ، أخجل من نفسى فأعود ، هو يبدو عليه أثر الفقر ولا يبدو عليه أثر التسول 

تشجعنى ، فأستجمع قواى .. أذهب .. أقف بجانبه .. أسأله عن أى شئ ، لا يجيب 

أخرج كل ما فى جيبى وأضعه فى يده ، يخبرنى فى تردد أن لا  

أربت على يده : أنت تحتاجهم أكثر منى  

يأخذهم ويذهب بعيداً وقد استقام عوده وارتسمت ضحكة منكسرة على وجهه وتسارعت خطواته 

أعود فاجلس بجانبها وقد أغرقت الدموع وجهيْنا 

أتسائل فى نفسى : كيف كانت الأم تجلب الطعام للصغار ... !! 

تمت 

رسالة إلى صديقى السلفى

صديقى السلفى ..

انت تكره البرادعى ؟؟ ،

تعتبره عميلا أمريكياً اسرائيلياً ماسونياً ؟؟ ،

تشوه صورته كما لم تفعل مع مبارك ونتنياهو وجورج بوش ؟؟ ،

تسفه من آراؤه وأفكاره ؟؟ ،

لا تعتقد فى صلاحيته وقدرته على فعل أى شئ مفيد للبلد ؟؟

حسنا يا صديقى العزيز ,, لقد وصلت لمرتبة لم يصل إليها إلا شخص واحد فى العالم كله ,, فـالفارق بينك وبين توفيق عكاشة أصبح صفراً .

صديقى السلفى ، آه نسيت ، هل تسمح لى أن أناديك بصديقى ؟

أم أنك تعتقد داخليا أنك أعلى منى مقاما عند الله ؟؟ فأنت ولله الحمد بطبيعتك تتبع حزب الله بينما أنا بالضرورة أنتمى لحزب الشيطان ؟

لابأس من تحملى قليلا ، أنت تقرأ فى المصحف كثيرا ، تحمل نسخة منه أينما ذهبت ,, على عكس أمثالى الذين لا يحفظون آية واحدة من كتاب الله ويتلجلجون كلما حاولوا الاستشهاد بآية قرآنية أثناء النقاش معك ؟؟

دعنى اذكرك يا صديقى أن صحابى جليل هو خالد بن الوليد لم يحفظ القرآن ولا اعتقد أنا ـ ولا أنت قطعا ـ أن ذلك ينقص من قدره أو يقلل من إيمانه

ألا تعتقد مثلى أن فهم كتاب الله فهما صحيحاً أهم كثيرا من حفظه وحمله كمثل الحمار يحمل أسفارا ؟

إذن هلا فهمت معى تلك الآية ( ولقد كرمنا بنى ادم ) الإسراء ـ 70 ؟؟

ربما بعد التمعن فى فهم الآية سترى مثلى أن السلفيين لا حظوة خاصة لهم عند الله

دون بقية المسلمين ، بل دون بقية البشر

دعنى أعود لأحدثك عن البرادعى مرة أخرى

أنت لا تعترف له بأى دور فى الثورة التى صنعها الله على عينه , بل تؤكد أنها ثورة إسلامية لأنها خرجت من المساجد والزوايا ؟ وهى إذن بعيدة كل البعد عن ذلك العلمانى ؟؟

حسنا ، هل مازلت تؤمن حقاً أن البرادعى علمانى ضد الدين ؟؟

ألا تعتقد مثلى أن ما تستشهد به للتدليل على صحة ادعائك ضلالات لا أساس لصحتها !! ,, فتارة كلمة قالها اعلامى عن إخلاصه لعلمانيته لم يردها البرادعى ثم فى حديث مع إعلامى آخر نفى كونه علمانى أو ليبرالى؟ وتارة أخرى تستشهد بإدعاءات إعلام النظام البائد .. أنت لا تصدق إلا ما يخدم مصالحك وتريد أنت تصديقه 

ألا تشعر بالعار عندما تتوحد رؤيتك مع فلول النظام البائد، وتتحد قواك معهم بكل همة لاغتيال سمعة الرجل ؟

يتحدث البرادعى كثيرا عن حقوق الإنسان .. هل لا تزال ترى أن حقوق الإنسان هى حرية الشذوذ وحرية الزنا وحرية شرب الخمر ،،

هل مازال عقلك يخبرك أن الحرية هى مرادف للتفسخ الاخلاقى ؟

أليست المساواة والعدل وحرية الاعتقاد وحرية التنقل والمسكن والمأكل والعمل حقوق ؟؟

هى حرية الاعتقاد هذه لب المشكلة .. الرجل يلعب بالألفاظ كعادته ، كيف تريدنى أن أعترف بحق الملحد والمجوسى والسيخى فى ممارسة شعائر دينه ؟

أنت لاتعترف إلا بالديانات السماوية الثلاث ,, هل أنت حقا كذلك ؟ هل تعترف بالمسيحية واليهودية ؟؟

إذن لماذا تسفه من عقائد النصارى فى كل مجلس ، وتدعو على اليهود أبناء القردة والخنازير فى كل صلاة أن ييتم الله أبنائهم ويرمل نسائهم ويحصيهم عددا ويقتلهم بددا ولا يبق منهم أحدا ؟؟

إنهم يغتصيون أرضنا .. هلا بحثت معى عن الفارق بين اليهودى والصهيونى ؟؟

كيف يا صديقى تتشدق بأنك تحترم اليهودية والمسيحية وأنت لا تستطيع احترام أبناء نفس ملتك ؟؟

مارأيك فى عقيدة الشيعة ؟ تراها فاسدة .. هل تسمح لهم بممارسة عقيدتهم ؟؟

أنت ترى خللا مركبا فى عقيدة الاخوان المسلمين ، يقال أن السلفى لا يرتضى الصلاة خلف الإخوانى !!

صديقى السلفى دعنى أصدمك بالحقيقة المرة .. أنت لاترى إلا نفسك ولا تعتقد أن أحدا على سبيل الحق غيرك ، أنت وحدك الفرقة الناجية وكلنا إلى جهنم وبأس القرار ،

للأسف ياعزيزى أنت عنصري جدا .

وهذه مشكلة البرادعى معك أو مشكلتك معه لافارق ،،

البرادعى يحترم الاخوانى والسلفى والشيعى والهندوسى والمجوسى والسيخى واللادينى ،

يحترم حقهم جميعا فى الصلاة والتعبد لإله واحد ، بينما أنت تحتكر هذا الإله الواحد لك وحدك !!

ـ أنتم تألهون الرجل وتعبدونه من دون الله ولا تعترفون له بأى خطأ كأنه ملاك من السماء

حسنا يا صديقى السلفى ، أنا لا أريد أن يتحول البرادعى إلى إله يسبح مريدوه بحمده آناء الليل وأطراف النهار ,, ولكن أخبرنى لماذا تصر على تحويله لشيطان تستعيذ بالله من شره خمس مراتٍ فى اليوم ؟؟؟

لا أريده أن يتحول لصاحب مقام له دراويش واتباع ،، ولكن ألا ترى معى أنه يستحق بدلا من اللعن والسب والتشويه ، الشكر والعرفان والاعتراف بدوره فى الثورة وحقه كمواطن مصرى فى الترشح لمنصب رئيس الجمهورية لخدمة بلده ؟

ألا تعترف أنه اول من تحدى النظام وأعلن رغبته فى اعتلاء الكرسى الكبير بينما كنت أنت وزمرتك تستعدون لمبايعة ابن المخلوع رئيسا مدى الحياة وأميرا للمؤمنين وحاكماً لا يجوز الخروج عليه ؟؟

صديقى السلفى أنت تشوه صورة البرادعى بالباطل وتعترف بذلك ، أنت ترى أن الحرب خدعة و الغاية تبرر الوسيلة ، وأن الحسنات يذهبن السيئات وكل شئ مباح فى سبيل تحكيم شرع الله ـ الذى لا تريد أن تعرفه لى تعريفا واضحا محددا لاشية فيه ـ

وطالما أن شرع الله ـ كما تفهمه أنت ـ جميلا جدا هكذا فلماذا لا تظهر سيماه على تصرفات معشر السلفيين ؟ ولماذا لا تطبقونه من الآن على أنفسكم ؟؟

انت تشتم البرادعى وتشوه صورته بكل الطرق النظيفة وغير النظيفة .. أنت تفعل ذلك ولا تعى أن الله طيب لا يقبل إلا طيب ,, ولن يقبل منك ما تفعله طالما لم تتق الله فيه .

وكل ذلك فى سبيل وصول شيخك للحكم كى يطبق شرع الله ,, رغم أنك لا تطبق شرع الله عندما توسد الأمر لغير أهله

صديقى السلفى ، أنا أعلم جيدا أن شيخك لن يصل للحكم لمئات الأسباب ،، وأن القائمون على الأمر الآن يستخدمونك ضد البرادعى لذر الرماد فى العيون ،، حتى يصل للحكم من يريدونه هم أن يصل .

بعض البسطاء فى الشارع يقولون .. ( كله إلا البرادعى ) .. وهذا يا صديقى بعض مااقترفت يداك ،، عمايل إيديك يا عزيزى وهذا بالظبط وتحديدا ما يريده القائمون على الامر ان يحدث .. كله إلا البرادعى

صديقى السلفى لاتغضب عندما أنعتك بالحماقة، والتعجل، وعدم التفقه بفقه الأولويات، وعدم الدراية بما يحدث الآن، والخديعة الكبرى التى تعد من أجلك أنت وكل الحالمين،

أنت كصاحب الدب الذى قتله من شدة الحنان

صديقى السلفى أنا سأنتخب البرادعى ولن أدعوك لانتخابه ، ولكن دعنى أؤكد لك أن مرشحك الموعود ورئيسك المنظر لن يراها بأم عينيه وإن كنت أتمنى فلاحه إن صدق

فقط أمامك البرادعى أو من يريدونه هم أن يصل ،، وأنا وأنت نعلم أنهم لن يحكِّموا شرع الله

فيك عندما يحققوا اقصى استفادة منك ، ولن يراعوا فيك إلا ولا ذمة

فقط يا صديقى اتركها منافسة شريفة ، حتى يحدث الله أمرا كان مفعولا .. وإنّا لمنتظرون

Fb note

Ahmed ELHadidy 29 / 8 / 2011 

بيان بشأن صفحة النبى رقم 1

دا اللنك اللى بيقول إنى مفبرك الصورة
http://twe.ly/GQpb
وهو كما بيدعى إنى أخدت أجزاء من حوار محمد حلمى ده فى المسابقة الرمضانية 


( الناس دى فعلا سلفيين وبتوع ربنا ؟؟ الشيطان نفسه مايعرفش يألف كده )

****
أنا عايز احكى الحكاية من الاول 
الصفحة عملت استفتاء بين د. البرادعى و ا/ حازم أبو اسماعيل واحدة من الفريندز عندى كتبت كومنت وناس علقت عليه ودخلنا كلنا حوار . ( بالمناسبة هو حذف تعليقاته فى البوست ، وبعدها حذف البوست كله .. بس أنا كنت خلاص عملت البرينت سكرين )


الحوار كان بين اتنين سلفيين ( عمر و محمد ) وأنا وواحد اسمه هشام .. 


استمر النقاش فترة وبعدين دخل اللى اسمه ( محمد حلمى ) وجه كلامه ليا مباشرة وقاللى اهدا على نفسك مالك بتتناقش بحدة وعامل نفسك بس اللى فاهم كل حاجة 


وبعدين قالى مباشرة ان الصفحة هتعمل أكبر حملة تشويه للبرادعى على الفيس بوك بس بعد العيد بواسطة الأدمن اللى اسمه (Q.M ) 


وأنا كتبت دا فى استيتس عندى ع الفيس وقتها 


ودا اللنك 
http://twe.ly/CQpb


بعدين كل الناس انسحبت من الحوار وفضلنا نتناقش لوحدنا 
أنا الحقيقة كنت بشتمه جامد جدا وقلتله انتوا كلكوا مخبرين لامن الدولة والبيدج دى امن الدولة هو اللى بيديرها ومش بتعمل حاجة غير تشويه البرادعى وحركة 6 ابريل 
هو وقتها حب يعاقبنى .. عمل البوست ده 


http://twe.ly/EQpb




اللى بيتهم فيه البرادعى اتهام صريح بالعمالة لاسرائيل 


وجاب لى اللنك وقاللى اشتم براحتك بقى زى ماهو واضح فى الصورة من الحوار اللى أنا عملتلها برينت سكرين 
وبعدين قاللى اتأسف وأنا أشيل البوست


طيب ليه فيه مشكلة فى التوقيتات تبين أنى مفبرك الصورة ؟؟


اولا :
 أنا مش خبير فوتو شوب وأنا مقطع الحوار على برنامج الرسام بطريقة بدائية جدا :))


ثانيا :
الحوار كان طويل جدا وفيه تريقة وشتيمة وسخرية وضحك فأنا شلت كل ده وجبت بس الكومنتات اللى تبين كلامه عن الفبركة المتعمدة ضد د. البرادعى


ثالثا  والأهم : 
أنا لما عملت برينت سكرين لأول جزء وأخدت وقت أظبطه كان فعلا فات حوالى 4 دقايق ولما عملت برينت سكرين للتانى كان فات الوقت ده ( عداد الوقت بتاع الفيس كان بيعد وانا بظبط الصورة ع الرسام ) ,, وبان فرق التوقيت بين المقطعين زى ما هيبان من شرح الصور 

                                   دا الجزء الاول

ودا الجزء التانى 

لو جيت تبص على تتابع الوقت فى كل صورة منفصلة على حدة ،، هتلاقيه مظبوط جدا ,, إنما لما تركب الصورة على بعضها وتشوفها تحس بالفبركة ( المزعومة ) وهى دى النقطة اللى هو لعب عليها


وعموما لو أنا كذاب هو يقدر  تنشر النوت دى على البيدج ويفند كلامى ده  ويكذبنى والأهم من كده طالما انه راجل بتاع ربنا يقدر يعمل حاجة أسهل من كده بكتير جدا 
هو يقسم بالله العظيم انه مقالش الكلام ده وأنى برضه مفبركه .. لو أقسم بالله يبقى أنا راجل كذاب ومدلس ومفبرك وفى النهاية بقدم اعتذار شديد للدكتور البرادعى بسبب الزج 
باسمه فى موضوع تافه زى ده 




بردعاوى وافتخر :)


أحمد الحديدى // 24 أغسطس 2011

http://twe.ly/CQpb

مقومات نجاح الثورة الثانية ــ 8 يوليو

تعرف عدوك بالظبط ( المجلس العسكرى ) ... وكمان معظم أسلحة الجيش ضدنا أصلا .. راجع موقف الشرطة العسكرية والفرقتين 777 , 999 اللى هما مكافحة ارهاب دولى .. مش عارف مكافحة ارهاب تيجى تضرب فينا ليه اصلا ؟؟ .. من الاخر يعنى افهموا ان مش بس المجلس العسكرى هو اللى ضدنا .. لا كمان جناح كبير من الجيش ضدنا وشايفنا شباب كنتاكى وأجندات .. والفضل يرجع لسى اسماعيل عتمان






لازم الثورة تكون موجهة فى اتجاه معين ومحددة اهدافها كويس علشان تعرف تنجزها
وكمان نتجاوز خطأ الثورة الأولى لاننا كنا فاكرين ان اسقاط مبارك يعنى اسقاط النظام .. واكتشفنا دلوقتى ان دا مش صحيح .. للاسف بعد فوات الآوان




2 استقالة عصام شرف ويعلن على الملأ ان الجيش متواطئ وبيسرق الثورة وانه لم يستطع تنفيذ وعوده لنا وهاهو عاد للميدان كما وعد




3 ائتلاف شباب الثورة دا يحل نفسه حالا وبرضه يعلنوا ان الجيش يسرق الثورة على الملأ






لو الخطوتين 2 ,3 دول حصلوا قدام الشعب كله .. الشعب كله هيعرف انه مضحوك عليه فعلا ويبدأ يفوق .. انما طالما عصام شرف موجود وراضى والائتلاف موجود وبيتحاور مع الجيش .. الناس البسيطة فاكرة ان الدنيا زى الفل والثورة ماشية عال العال






4 تجمع كل القوى على هدف وااااحد وهو التخلص من الحكم العسكرى تماما


5 الاتفاق على حكومة تكنوقراط ائتلافية ورئيس مؤقت لمدة سنتين تكون مهمته




محاكمات سياسية عادلة لجميع أقطاب النظام البائد
تطهير مؤسسات الدولة كاملة ( شرطة + قضاء + جيش + اعلام + مؤسسات اقتصادية ) واعادة هيكلتها تماما
انتخاب او تعيين لجنة تأسيسية لوضع دستور جديد
وضع قوانين انتخابية واضحة لمجلسى الشعب والشورى والمجالس المحلية والنقابات وانتخابات الرئاسة وقانون الاحزاب .. مع ضمان حق المصريين بالخارج فى التصويت وتفعيل نظام التصويت الالكترونى
حل جميع الاحزاب الكرتونية القديمة .. ومن ثم اطلاق حرية تكوين الاحزاب والجماعات والمنظمات الأهلية وفقا للقانون


لا يكون من حق اى فرد فى الحكومة الائتلافية او الرئيس المؤقت .. ترشيح نفسه فى اول انتخابات تشريعية او رئاسية






هذا والله الموفق .. ولو انا اتقفشت وخبطونى  10 سنين محاكمة عسكرية
ذنبى فى رقبتكم ورقبة مصر اللى وجعت قلوبنا كلنا ^_^

أنت بتستعمانى يا جيش ؟؟؟

راحت السكرة وجاءت الفكرة والنهاردة فات 4 شهور على بداية الثورة ومازالت الثورة مستمرة .. صحيح انها ماشية ببطئ السنين لان فيه حد عايز كده .. حد بيخدر الثوار وبيستهبلهم ومن الاخر بيستعماهم

الحد دا هو المجلس العسكرى اللى بيتولى ادارة شئون البلاد ..

طب هو ليه بيستعمانا ؟ ..

الاجابة مش صعبه اوى كده زى ما الناس متخيلة .. عادى الاجابة سهلة جدا .. بيستعمانا لانه مش عايز الثورة تكمل ؟ ..

طب لى برضه ؟ ..

عشان لو الثورة كملت رجليه هتيجى فى الخية وكل اعضاءه اللى انا لحد الان مش عارف هما كام نفر اساسا ناس تقول 18 وناس تقول 36 + المشير جدو طنطاوى كل دول مرتبطين بمصالح مع النظام السابق

وعشان برضه من الاخر المجموعة دى مش بتتحرك من دماغها .. ربنا يكفيكوا شر القوى الاقليمية والدولية اللى هى من غير ذكر اسماء ـ عشان بس الواحد خايف ينسى حد ـ امريكا واسرائيل ودول الخليج

واخدنلى بالكوا ؟؟ .. ركزوا معايا بقى فى اللى جاى

1

المجلس العسكرى بيستعمانا لانه مصمم يخلط بين مسمى المجلس العسكرى والجيش فلما تنتقد المجلس العسكرى

ـ سياسيا لا عسكريا ـ تستفز الناس البسيطة اللى الجيش عندهم شئ مقدس وبكده يضمن حزب الكنبة والاغلبية الصامتة فى صفه ضدك

مابالك بقى لو انا استغبيت وانتقدته عسكريا وقلتلك معلومة ع الخفيف كده ان المجلس العسكرى دا مفيش فيه شخص واحد قائد جيش ميدانى برى أو جوى أو بحرى !!! .. نعم ؟؟ ازاى يعنى ؟؟ طب تم اختيارهم على اساس اى ؟ .. آها سألتنى انت على أساس اى ؟؟ .. بسم الله الرحمن الرحيم الاجابة : الولاء للمخلوع .. آيون صدقنى .. الولاء للمخلوع .. طبعا مش مكتوب كده فى بطاقتهم الشخصية يعنى .. بس هو كده

2

الجيش بيستعمانا لما قالنا انه حمى الثورة .. والحقيقة انه عمى الثورة .. انا معلوماتى المتواضعة ان يوم جمعة الغضب لما ذخيرة الأمن المركزى خلصت بدأت مدرعات الجيش " الحرس الجمهورى تحديدا " تنقل الذخيرة للشرطة عشان يكملوا عملية حماية الثورة المجيدة .. بس يحموها من الثوار .. مش من اللى الثورة قامت ضدهم ولما الثوار اكتشفوا الخدعة أشعلوا النيران فى 3 مدرعات بينما يهتفون فى نفس ذات الوقت سلمية سلمية ..

3

الجيش بيستعمانا لما قالنا انه حمى الثورة تانى .. رغم ان موقعة الجمل حدثت تحت سمع وبصر الجيش محركش ساكن .. قال أيه عشان واقف ع الحياد !! .. لو راجعت معلوماتك وركزت شوية هتتأكد ان موقعة الجمل تم التخطيط ـ شارك فى التخطيط ده كل المستفيدين من نظام المخلوع ولا أستعبد ان يكون العسكر شاركوا على الأقل بوقوفهم او قعادهم حتى ع الحياد ـ لها بذكاء شديد وفعلا كانت كفيلة بانهاء الثورة واخلاء الميدان تماما من الثوار أحياء أو أموات .. بس الفضل يرجع لربنا ولرجولة الثوار ـ رجالة وبنات عادى ـ وفى القلب منهم شباب الاخوان .. ربنا يكرمهم ويهديهم ويعملولنا ثورة على مكتب الارشاد دا ويخلصونا منه خصوصا الاخ الفلوطة .. احنا جايين نهدى النفوس

ببساطة يا ايها السادة الاعزاء الجيش لا حما الثورة ولا غيره .. الجيش عمل بمبدأ كروى مصرى أصيل .. الجيش كان بيشجع اللعبة الحلوة .. الجيش وقف مع الكسبان .. مال مع كفة مبارك فى البداية .. وقبل ان تضع الثورة أوزارها بيوم واحد خرج بالبيان الشهير " المجلس العسكرى فى حالة انعقاد دائم "

أسباب انحياز ـ لا أقول حماية ـ الجيش للثورة :

ـ اولها وابرزها ع الاطلاق اللى قلناه من ان الثوار حرقوا مدرعات الجيش .. والجيش عرف ان مهمة قمع الثورة تكاد تكون مهمة انتحارية .. يعنى الشعب اللى هزم أعتى جهاز شرطى فى الشرق الأوسط واللى عدد أفراده تفوق عدد قوات الجيش 3 مرات فى 4 ساعات .. اكيد يعنى الجيش مش هياخد معاه ساعتين زمن

ـ السبب التانى .. معروف ان التجنيد فى مصر اجبارى يعنى افراد الجيش ده انا وانت واخويا واخوك

عايز أقول من الاخر ان الرتب الدنيا فى الجيش من عقيد ونازل لحد عسكرى نفر كانوا هيرفضوا تنفيذ الأوامر بالضرب فى المليان لو الأمر اتطور والدم بقى للركب .. ودا حصل فعلا .. وفيه رتب أقسمت بالله لصحابى الاخوانجية فى الميدان ان جالهم الاوامر بمساواة الميدان بالأرض وبعدين سحبوا الاوامر تانى وهنروح بعيد لى ؟؟ .. المشير ورئيس الأركان نفسهم اعترفوا بده

ولو كنت فى الميدان أكيد شفت الطائرات الحربية اللى كانت بتحلق على ارتفاع منخفض جدا لارهاب الثوار

ـ السبب التالت والاهم على الاطلاق .. رفض الجيش لمشروع التوريث تماما .. مش لانهم حاشا لله عايزين الديمقراطية وبيحبوها قد عيونهم الجوز .. بس تقريبا كده عشان عايزينها عسكرية عسكرية .. والثورة دى جاتلهم فى الوقت المناسب فكان لازم يستغلوها صح .. وهما دلوقتى بيستغلوها أوسخ استغلال

ـ السبب الرابع .. هو اللى حاصل دلوقتى .. بمعنى ان وقوف العسكر مع الثورة نقلهم من موقع شخصيات من النظام البائد يجب محاكمتهم واعدامهم الى أبطال يحمون الثورة ويديرونها ويوجهونها زى ما هم عايزين

4

الجيش بيستعمانا لما صمم يخلى الميدان تماما يوم 12 فبراير وشفنا كلنا الشرطة العسكرية وهى بتعتدى على الثوار اللى صمموا ع الاعتصام .. طبعا تنفيذا للخطة الموضوعة .. وكمان شفنا فض اعتصامات متتالية بنفس الاسلوب .. 9مارس و9 ابريل .. وتشويه الثوار وسجن اكتر من 10 آلاف ثائر فى السجون الحربية ومحاكمتهم محاكمات عسكرية استثنائية سريعة والكشف على عذرية البنات واتهام الشباب والبنات باتهامات قذرة مخزية ليس اقلها العمالة والدولارات والكنتاكى

5

الجيش بيستعمانا لما صمم على بقاء حكومة شفيق رغم ان كلنا رفضناها ولما صممنا اوى وعملنا مليونيات .. سى شفيق اتكرم وقدم استقالته واخد معاه البلوفر ومشى

6

الجيش بيستعمانا لما عملنا وزارة فيها 22 وجه من النظام القديم و 17 وش عكر من الحزب الوطنى منهم رئيس الوزرا شخصيا عصام شرف اللى هو راجل محترم نصف ثورجى .. بس كل انجازاته لحد دلوقتى انه زار اثيوبيا وبرضه هتبنى السد وتموتنا من العطش .. واكل فول وطعمية عند التابعى وشال جزمة الحاجة راوية وطلب الاسعاف لسواق التك تك

7

الجيش بيستعمانا لما خرج علينا اللواء ممدوح شاهين يقولنا ان الجيش تولى حكم البلاد بموجب مادة فى الدستور وليس بالشرعية الثورية .. دستور اى ياعم انت ؟؟ هو مش الدستور سقط بسقوط النظام ؟؟ .. آه نسيت .. النظام لم يسقط بعد.. وبعد الاستفتاء قالنا ان اللى قالوا نعم 77 % .. كانوا بيقولوا نعم لشرعية الجيش فى " حكم البلاد " حتى يسلم السلطة للمدنيين .. يوم القيامة العصر بعون الله

ياسيادة اللوا اللى قالوا نعم منهم ناس نيتها صافية قالوا كده عشان مش عايزين يشوفوا وشك بعد 6 شهور

8

الجيش بيستعمانا لما عمل استفتاء على 9 مواد بس .. وبعدين حط اعلان دستورى من تلاتة وستيييييييييييييييييييييييييييييين مادة ليكون أطول اعلان دستورى فى تاريخ الثورات .. دا مش اعلان ضصطورى .. دا اعلان حرب

9

الجيش بيستعمانا لما عمل استفتاء مش عشان يعرف الشعب عايز اى لانه اصلا نفذ رأى الاقلية لما عمل اعلان دستورى ونفذ رأى الاغلبية لما قالهم انه هيمشى بعد 6 شهور بقوا 9 شهر .. باختصار هو عمل اللى على مزاجه واللى فى مصلحته

طب لى بقى عمل الاستفتاء ده ؟؟

أقولك أنا ..

ـ الاستفتاء ببساطة اتعمل عشان يفرقنا ونجح انه يعمل ده بقينا اسلاميين وليبراليين وعلمانيين وقوميين واشتراكيين وسلفيين ومسيحيين مع اننا من شهر واحد بس كنا كلنا مصريين ثوريين

ـ معرفة القوة الاكثر " تأثيرا " فى الشارع .. ودول بقى احنا عايزينهم عشان نستخدمهم احسن استخدام بس طبعا هما مش هيدونا حاجة بلوشى فاحنا نطمنهم ونوعدهم ونمنيهم .. هنسيبلكوا مجلس الشعب .. هتعملوا الدستور ..

ها مقابل اى ؟؟

لا مفيش احنا عندنا شوية ناس عاملين ناصحين وفاهمين ومتنورين بيسموا نفسهم الليبراليين والعلمانيين والنخبة ودول اللى دعوا للثورة أصلا ووجعوا دماغنا .. اتسلوا عليهم .. شوهوا صورتهم فى الشارع .. كرهوا الناس فيهم .. ولوتعرفوا ترموهم بمية نار يبقى كويس

10

الجيش بيستعمانى أنا شخصيا لما مشيت ورا الاعيبه وبقيت ادافع عن الليبراليين والنخبويين بكل أسلحتى وأهاجم كل اللى يعاديهم بكل شراسة وغباء أحيانا وكل ماحد يقولى انتى اى ؟؟ أقوله انا ليبرالى وافتخر .. وبعدين أدخل فى مناظرة مع شخص سلفى الاقيه عاملى برينت سكرين لكل اللى كتبته فى الفيس عن ليبراليتى المتشددة " هو جاب وقت منين عشان يعمل كل ده " .. رغم انى أصلا دفاعى عن الليبراليين كان من منطلق سياسى بحت .. من منطلق خوفى على الثورة مش أكتر .. وهجومى ع السلفيين اللى بعترف انه كان قاسى كان من خوفى عليهم هما من اللى جاى قدام .. من منطلق انهم مستخدمين من العسكر وهيأدوا مهمتهم ويرجعوا لجحورهم تانى .. وبقيت بقى عدو الاسلام وكافر وحاجات كتير .. لأنى خايف على ثورتى اللى بتتسرق قدامى

11

الجيش بيستعمانا لما ساب حسنى وولاده ورجالته بره السجون شهرين كاملين يظبطوا ورقهم عشان يتحاكموا محاكمات تمثيلية كده أى كلام .. أصلا ازاى حسنى يتخلى عن الحكم وتجيله الجرأة انه يقعد فى البلد وهو عارف ان طوب الأرض بيكرهه وعايز ينتقم منه .. مين اداله الأمان ؟؟ .. لى مايسافرش بره يتمتع بفلوسه

12

الجيش بيستعمانا لما صرف 200 مليون جنيه على استفتاء فاشل ولما بيحاكم الحرامية قدام محاكم بطيئة هتجيب لنا شلل نصفى وهتجيب لنا فلوسنا فى مطلع القرن الجاى وهو مصدعنا بالازمة الاقتصادية والسيولة المالية واحتياطى النقد وبسكلتة الانتاج وتروللى التنمية

والبلد اللى هتخرب والناس اللى هتموت من الجوع

طيب يا عم الجيش بطل مصاريف شوية .. الغى العام الدراسى الللى مالوش لازمة هو احنا عندنا تعليم اصلا ؟ الغى الدورى والملايين اللى بتتصرف على الكورة .. اوقف اصدار المليون جرنان اللى بتصرف عليهم من فلوس الدولة ومحدش بيقراهم اصلا .. اقفل قلعة الخطيئة اللى اسمها ماسبيرو دى اللى كانت مهمتها تزييف وعى الشعب ومازالت ... اعمل حد أقصى للاجور .. ارفد ال 60 الف مستشار اللى فى حكومتك اللى مالهم أى 30 لازمة

حاكم رجال الاعمال وامم شركاتهم وارميهم فى السجون .. بدل ما انت رايح تعملى قانون مصالحة معاهم

وسايبلى نجيب ساويرس يطلع يقولنا المستثمرين بيطفشوا بسبب المحاكمات .. يعنى من الاخر عايز يقول سيبونا نسرق فى هدوء

السياحة انضربت فى شرم ؟؟ فعلا دى حقيقة .. بس انت السبب ولا حد غيرك .. سايب مبارك هناك يعمل اى ؟؟ اساسا مصاريف علاجه فى مستشفى زى دى مين بيدفعها ؟ شرم بتخسر يوميا 40 مليون دولار .. عشان المخلوع قاعد فيها .. طب ماترميه فى أى زنزانة ونخلص لو فعلا خايف على اقتصاد البلد .. دا لو فعلا اقتصاد البلد واقع ؟؟

أصل المعلومات اللى عندنا بتقول ان الاقتصاد المصرى بينمو بشكل مذهل رغم اننا خارجين من ثورة

وبتقول اننا تقريبا هيبقى عندنا اكتفاء ذاتى من القمح فى سنة واحدة

أقولك يا عم الجيش يا حامى الثورة والبلد انت اقرى كل مقالات وائل جمال فى الشروق من بعد الثورة

ولو انت مش فاهم حالة الاقتصاد بتاعتنا حاليا هتفهم من مقالاته كتير .. دا لو انت مش فاهم

طب ما تسأل وزير المالية بتاعك اللى هو عضو لجنة سياسات حزب وطنى ومستشار مالى لجمال مبارك .. وسايبه رايح يستلف مليار دولا ر من البنك الدولى .. عشان نفضل تابعين للغرب

أقولك .. انت خايف ع الاقتصاد اوى .. طب فين ال 1200 مليار جنيه اللى اتهربوا من البلد فى عهد حكومة شفيق تحت سمعك وبصرك ؟؟ أنت متخيل الرقم قد اى ؟؟ .. واتهربوا راحوا فين ؟؟؟ وشفيق مش بيتحاكم على دا لى ؟؟

13

الجيش بيستعمانا لانه مصمم يسيطر على الاعلام سواء كان حكومى او خاص .. البلد دى عمرها ما تتظبط الا لو الاعلام كان حر .. طول ما الاعلام موجه .. طول ما البلد بايظة .. طول ما انت بتلعب فى دماغ الشعب وتقضى على وعيه .. طبعا أنا عارف ان مسيطر على الاعلام دى .. يعنى التلميع والتشويه

البرادعى .. آه م البرادعى البعبع اللى بيطلع لكل لواءات المجلس فى الاحلام والكوابيس ؟؟ .. هو البرادعى ممكن ياخد مننا البلد .. ممكن يحكم .. ممكن يخليها مدنية بجد ؟؟ ممكن يقضى على سيطرة العسكر على البلد من أكتر من 60 سنة .. بيسأل على موازنة الجيش ؟؟ هى حصلت يابرادعى .. موازنة الجيش ؟؟

لا الراجل دا مش ممكن يمسك .. استحالة .. الاخوان فاكرين نفسهم أذكى مننا وهينتخبوا البرادعى وهما أصلا هيسيطروا على مجلس الشعب

يبقى الجيش يحط خطة عبقرية :

ـ شفيق يستقيل من رئاسة الوزرا قبل الانتخابات بشهرين يترشح ويكسب .. طب شفيق فلسع

ـ نلمع باقى المرشحين .. عندنا عمرو موسى .. شعبولا بيحبه وجمهور شعبولا بيحبه .. نزل عمرو موسى الشارع .. المقابلة مش تمام .. عملوا قياسات للراى العام .. الاسلاميين مش عايزينه

ـ السيطرة على الاعلام .. نشوه فى الراجل زى ما احنا عايزين " البرادعى لحد النهاردة ممنوع يظهر فى التلفزيون المصرى "

ـ نطلق عليه الجماعات الراديكالية .. يعنى اى دولة مدنية يا برادعى ؟ " يعنى أمك ما تلبسش حجاب "

ـ ننزل مرشحين اسلاميين .. الناس قى الشارع مش عبيطة .. مش هينتخبوا حد لان دقته أطول من التانى

يعنى حسان مينفعش ؟؟ لالا ما ينفعش

ـ عبد المنعم أبوالفتوح يترشح خلافا لجماعة الاخوان .. الاخوان مش هيدعموه .. فعلا ؟؟ .. ايوه والله مش تمويه ولا حاجة .. الاخوان اتعلموا من سيناريو الجزاير 1992 وغزة 2006

ـ طب مفيش مرشح اسلامى عليه توافق من الاخوان والراديكاليين والجهاديين .. آه فيه حد كويس .. د. محمد سليم العوا على شبه توافق .. وكده نضمن ان اصوات وحشد الاخوان ميكونش مع البرادعى أو ع الأقل نعمل تشتيت اصوات لمصلحة عمرو موسى

لو حد بيقرى وشايف ان اللى بقوله دا خيالات مريضة .. عايزه يحاول يقنعنى ان طنطاوى هيوافق ييجى مرشح ضد النظام السابق يحاكم كل دول وبلاويهم كتير .. الحل الوحيد انهم يجيبوا حد تبعهم ومعاهم شفيق أو عمرو موسى .. أو ينفذوا سيناريو الجزاير ويسيبوا الاسلاميين يوصلوا للحكم وبعدين يعملوا انقلاب عسكرى زى الفل دفاعا عن مدنية الدولة وحمايتها من الراديكاليين الذين يرعبون الداخل والخارج

والحقيقة ان الجيش بتاعتنا ما شاء الله عليه .. بيلعب على الخطتين بمنتهى الكفاءة

أنا الجيش استعمانى فى كل اللى قلته دا .. وطبعا ما خفى كان أعظم .. وأنا هنزل يوم 27 مايو أهتف ضد المجلس العسكرى .. هقوله مش أنا اللى اتقرطس فى ثورتى ..

أنت بتستعمانى يا جيش ؟؟ .. تقولى بحمى الثورة وانت بتسرقها ؟؟

كان المفروض اكتب التدوينة دى امبارح فى يوم التدوين ضد المجلس العسكرى .. بس اللى حصل بقى

ـ التدوينة دى اهداء للمناضل " النصرانى الكافر " مايكل نبيل اول من انتقد المجلس العسكرى ويدفع التمن الآن فى غياهب السجن العسكر