أنت بتستعمانى يا جيش ؟؟؟

راحت السكرة وجاءت الفكرة والنهاردة فات 4 شهور على بداية الثورة ومازالت الثورة مستمرة .. صحيح انها ماشية ببطئ السنين لان فيه حد عايز كده .. حد بيخدر الثوار وبيستهبلهم ومن الاخر بيستعماهم

الحد دا هو المجلس العسكرى اللى بيتولى ادارة شئون البلاد ..

طب هو ليه بيستعمانا ؟ ..

الاجابة مش صعبه اوى كده زى ما الناس متخيلة .. عادى الاجابة سهلة جدا .. بيستعمانا لانه مش عايز الثورة تكمل ؟ ..

طب لى برضه ؟ ..

عشان لو الثورة كملت رجليه هتيجى فى الخية وكل اعضاءه اللى انا لحد الان مش عارف هما كام نفر اساسا ناس تقول 18 وناس تقول 36 + المشير جدو طنطاوى كل دول مرتبطين بمصالح مع النظام السابق

وعشان برضه من الاخر المجموعة دى مش بتتحرك من دماغها .. ربنا يكفيكوا شر القوى الاقليمية والدولية اللى هى من غير ذكر اسماء ـ عشان بس الواحد خايف ينسى حد ـ امريكا واسرائيل ودول الخليج

واخدنلى بالكوا ؟؟ .. ركزوا معايا بقى فى اللى جاى

1

المجلس العسكرى بيستعمانا لانه مصمم يخلط بين مسمى المجلس العسكرى والجيش فلما تنتقد المجلس العسكرى

ـ سياسيا لا عسكريا ـ تستفز الناس البسيطة اللى الجيش عندهم شئ مقدس وبكده يضمن حزب الكنبة والاغلبية الصامتة فى صفه ضدك

مابالك بقى لو انا استغبيت وانتقدته عسكريا وقلتلك معلومة ع الخفيف كده ان المجلس العسكرى دا مفيش فيه شخص واحد قائد جيش ميدانى برى أو جوى أو بحرى !!! .. نعم ؟؟ ازاى يعنى ؟؟ طب تم اختيارهم على اساس اى ؟ .. آها سألتنى انت على أساس اى ؟؟ .. بسم الله الرحمن الرحيم الاجابة : الولاء للمخلوع .. آيون صدقنى .. الولاء للمخلوع .. طبعا مش مكتوب كده فى بطاقتهم الشخصية يعنى .. بس هو كده

2

الجيش بيستعمانا لما قالنا انه حمى الثورة .. والحقيقة انه عمى الثورة .. انا معلوماتى المتواضعة ان يوم جمعة الغضب لما ذخيرة الأمن المركزى خلصت بدأت مدرعات الجيش " الحرس الجمهورى تحديدا " تنقل الذخيرة للشرطة عشان يكملوا عملية حماية الثورة المجيدة .. بس يحموها من الثوار .. مش من اللى الثورة قامت ضدهم ولما الثوار اكتشفوا الخدعة أشعلوا النيران فى 3 مدرعات بينما يهتفون فى نفس ذات الوقت سلمية سلمية ..

3

الجيش بيستعمانا لما قالنا انه حمى الثورة تانى .. رغم ان موقعة الجمل حدثت تحت سمع وبصر الجيش محركش ساكن .. قال أيه عشان واقف ع الحياد !! .. لو راجعت معلوماتك وركزت شوية هتتأكد ان موقعة الجمل تم التخطيط ـ شارك فى التخطيط ده كل المستفيدين من نظام المخلوع ولا أستعبد ان يكون العسكر شاركوا على الأقل بوقوفهم او قعادهم حتى ع الحياد ـ لها بذكاء شديد وفعلا كانت كفيلة بانهاء الثورة واخلاء الميدان تماما من الثوار أحياء أو أموات .. بس الفضل يرجع لربنا ولرجولة الثوار ـ رجالة وبنات عادى ـ وفى القلب منهم شباب الاخوان .. ربنا يكرمهم ويهديهم ويعملولنا ثورة على مكتب الارشاد دا ويخلصونا منه خصوصا الاخ الفلوطة .. احنا جايين نهدى النفوس

ببساطة يا ايها السادة الاعزاء الجيش لا حما الثورة ولا غيره .. الجيش عمل بمبدأ كروى مصرى أصيل .. الجيش كان بيشجع اللعبة الحلوة .. الجيش وقف مع الكسبان .. مال مع كفة مبارك فى البداية .. وقبل ان تضع الثورة أوزارها بيوم واحد خرج بالبيان الشهير " المجلس العسكرى فى حالة انعقاد دائم "

أسباب انحياز ـ لا أقول حماية ـ الجيش للثورة :

ـ اولها وابرزها ع الاطلاق اللى قلناه من ان الثوار حرقوا مدرعات الجيش .. والجيش عرف ان مهمة قمع الثورة تكاد تكون مهمة انتحارية .. يعنى الشعب اللى هزم أعتى جهاز شرطى فى الشرق الأوسط واللى عدد أفراده تفوق عدد قوات الجيش 3 مرات فى 4 ساعات .. اكيد يعنى الجيش مش هياخد معاه ساعتين زمن

ـ السبب التانى .. معروف ان التجنيد فى مصر اجبارى يعنى افراد الجيش ده انا وانت واخويا واخوك

عايز أقول من الاخر ان الرتب الدنيا فى الجيش من عقيد ونازل لحد عسكرى نفر كانوا هيرفضوا تنفيذ الأوامر بالضرب فى المليان لو الأمر اتطور والدم بقى للركب .. ودا حصل فعلا .. وفيه رتب أقسمت بالله لصحابى الاخوانجية فى الميدان ان جالهم الاوامر بمساواة الميدان بالأرض وبعدين سحبوا الاوامر تانى وهنروح بعيد لى ؟؟ .. المشير ورئيس الأركان نفسهم اعترفوا بده

ولو كنت فى الميدان أكيد شفت الطائرات الحربية اللى كانت بتحلق على ارتفاع منخفض جدا لارهاب الثوار

ـ السبب التالت والاهم على الاطلاق .. رفض الجيش لمشروع التوريث تماما .. مش لانهم حاشا لله عايزين الديمقراطية وبيحبوها قد عيونهم الجوز .. بس تقريبا كده عشان عايزينها عسكرية عسكرية .. والثورة دى جاتلهم فى الوقت المناسب فكان لازم يستغلوها صح .. وهما دلوقتى بيستغلوها أوسخ استغلال

ـ السبب الرابع .. هو اللى حاصل دلوقتى .. بمعنى ان وقوف العسكر مع الثورة نقلهم من موقع شخصيات من النظام البائد يجب محاكمتهم واعدامهم الى أبطال يحمون الثورة ويديرونها ويوجهونها زى ما هم عايزين

4

الجيش بيستعمانا لما صمم يخلى الميدان تماما يوم 12 فبراير وشفنا كلنا الشرطة العسكرية وهى بتعتدى على الثوار اللى صمموا ع الاعتصام .. طبعا تنفيذا للخطة الموضوعة .. وكمان شفنا فض اعتصامات متتالية بنفس الاسلوب .. 9مارس و9 ابريل .. وتشويه الثوار وسجن اكتر من 10 آلاف ثائر فى السجون الحربية ومحاكمتهم محاكمات عسكرية استثنائية سريعة والكشف على عذرية البنات واتهام الشباب والبنات باتهامات قذرة مخزية ليس اقلها العمالة والدولارات والكنتاكى

5

الجيش بيستعمانا لما صمم على بقاء حكومة شفيق رغم ان كلنا رفضناها ولما صممنا اوى وعملنا مليونيات .. سى شفيق اتكرم وقدم استقالته واخد معاه البلوفر ومشى

6

الجيش بيستعمانا لما عملنا وزارة فيها 22 وجه من النظام القديم و 17 وش عكر من الحزب الوطنى منهم رئيس الوزرا شخصيا عصام شرف اللى هو راجل محترم نصف ثورجى .. بس كل انجازاته لحد دلوقتى انه زار اثيوبيا وبرضه هتبنى السد وتموتنا من العطش .. واكل فول وطعمية عند التابعى وشال جزمة الحاجة راوية وطلب الاسعاف لسواق التك تك

7

الجيش بيستعمانا لما خرج علينا اللواء ممدوح شاهين يقولنا ان الجيش تولى حكم البلاد بموجب مادة فى الدستور وليس بالشرعية الثورية .. دستور اى ياعم انت ؟؟ هو مش الدستور سقط بسقوط النظام ؟؟ .. آه نسيت .. النظام لم يسقط بعد.. وبعد الاستفتاء قالنا ان اللى قالوا نعم 77 % .. كانوا بيقولوا نعم لشرعية الجيش فى " حكم البلاد " حتى يسلم السلطة للمدنيين .. يوم القيامة العصر بعون الله

ياسيادة اللوا اللى قالوا نعم منهم ناس نيتها صافية قالوا كده عشان مش عايزين يشوفوا وشك بعد 6 شهور

8

الجيش بيستعمانا لما عمل استفتاء على 9 مواد بس .. وبعدين حط اعلان دستورى من تلاتة وستيييييييييييييييييييييييييييييين مادة ليكون أطول اعلان دستورى فى تاريخ الثورات .. دا مش اعلان ضصطورى .. دا اعلان حرب

9

الجيش بيستعمانا لما عمل استفتاء مش عشان يعرف الشعب عايز اى لانه اصلا نفذ رأى الاقلية لما عمل اعلان دستورى ونفذ رأى الاغلبية لما قالهم انه هيمشى بعد 6 شهور بقوا 9 شهر .. باختصار هو عمل اللى على مزاجه واللى فى مصلحته

طب لى بقى عمل الاستفتاء ده ؟؟

أقولك أنا ..

ـ الاستفتاء ببساطة اتعمل عشان يفرقنا ونجح انه يعمل ده بقينا اسلاميين وليبراليين وعلمانيين وقوميين واشتراكيين وسلفيين ومسيحيين مع اننا من شهر واحد بس كنا كلنا مصريين ثوريين

ـ معرفة القوة الاكثر " تأثيرا " فى الشارع .. ودول بقى احنا عايزينهم عشان نستخدمهم احسن استخدام بس طبعا هما مش هيدونا حاجة بلوشى فاحنا نطمنهم ونوعدهم ونمنيهم .. هنسيبلكوا مجلس الشعب .. هتعملوا الدستور ..

ها مقابل اى ؟؟

لا مفيش احنا عندنا شوية ناس عاملين ناصحين وفاهمين ومتنورين بيسموا نفسهم الليبراليين والعلمانيين والنخبة ودول اللى دعوا للثورة أصلا ووجعوا دماغنا .. اتسلوا عليهم .. شوهوا صورتهم فى الشارع .. كرهوا الناس فيهم .. ولوتعرفوا ترموهم بمية نار يبقى كويس

10

الجيش بيستعمانى أنا شخصيا لما مشيت ورا الاعيبه وبقيت ادافع عن الليبراليين والنخبويين بكل أسلحتى وأهاجم كل اللى يعاديهم بكل شراسة وغباء أحيانا وكل ماحد يقولى انتى اى ؟؟ أقوله انا ليبرالى وافتخر .. وبعدين أدخل فى مناظرة مع شخص سلفى الاقيه عاملى برينت سكرين لكل اللى كتبته فى الفيس عن ليبراليتى المتشددة " هو جاب وقت منين عشان يعمل كل ده " .. رغم انى أصلا دفاعى عن الليبراليين كان من منطلق سياسى بحت .. من منطلق خوفى على الثورة مش أكتر .. وهجومى ع السلفيين اللى بعترف انه كان قاسى كان من خوفى عليهم هما من اللى جاى قدام .. من منطلق انهم مستخدمين من العسكر وهيأدوا مهمتهم ويرجعوا لجحورهم تانى .. وبقيت بقى عدو الاسلام وكافر وحاجات كتير .. لأنى خايف على ثورتى اللى بتتسرق قدامى

11

الجيش بيستعمانا لما ساب حسنى وولاده ورجالته بره السجون شهرين كاملين يظبطوا ورقهم عشان يتحاكموا محاكمات تمثيلية كده أى كلام .. أصلا ازاى حسنى يتخلى عن الحكم وتجيله الجرأة انه يقعد فى البلد وهو عارف ان طوب الأرض بيكرهه وعايز ينتقم منه .. مين اداله الأمان ؟؟ .. لى مايسافرش بره يتمتع بفلوسه

12

الجيش بيستعمانا لما صرف 200 مليون جنيه على استفتاء فاشل ولما بيحاكم الحرامية قدام محاكم بطيئة هتجيب لنا شلل نصفى وهتجيب لنا فلوسنا فى مطلع القرن الجاى وهو مصدعنا بالازمة الاقتصادية والسيولة المالية واحتياطى النقد وبسكلتة الانتاج وتروللى التنمية

والبلد اللى هتخرب والناس اللى هتموت من الجوع

طيب يا عم الجيش بطل مصاريف شوية .. الغى العام الدراسى الللى مالوش لازمة هو احنا عندنا تعليم اصلا ؟ الغى الدورى والملايين اللى بتتصرف على الكورة .. اوقف اصدار المليون جرنان اللى بتصرف عليهم من فلوس الدولة ومحدش بيقراهم اصلا .. اقفل قلعة الخطيئة اللى اسمها ماسبيرو دى اللى كانت مهمتها تزييف وعى الشعب ومازالت ... اعمل حد أقصى للاجور .. ارفد ال 60 الف مستشار اللى فى حكومتك اللى مالهم أى 30 لازمة

حاكم رجال الاعمال وامم شركاتهم وارميهم فى السجون .. بدل ما انت رايح تعملى قانون مصالحة معاهم

وسايبلى نجيب ساويرس يطلع يقولنا المستثمرين بيطفشوا بسبب المحاكمات .. يعنى من الاخر عايز يقول سيبونا نسرق فى هدوء

السياحة انضربت فى شرم ؟؟ فعلا دى حقيقة .. بس انت السبب ولا حد غيرك .. سايب مبارك هناك يعمل اى ؟؟ اساسا مصاريف علاجه فى مستشفى زى دى مين بيدفعها ؟ شرم بتخسر يوميا 40 مليون دولار .. عشان المخلوع قاعد فيها .. طب ماترميه فى أى زنزانة ونخلص لو فعلا خايف على اقتصاد البلد .. دا لو فعلا اقتصاد البلد واقع ؟؟

أصل المعلومات اللى عندنا بتقول ان الاقتصاد المصرى بينمو بشكل مذهل رغم اننا خارجين من ثورة

وبتقول اننا تقريبا هيبقى عندنا اكتفاء ذاتى من القمح فى سنة واحدة

أقولك يا عم الجيش يا حامى الثورة والبلد انت اقرى كل مقالات وائل جمال فى الشروق من بعد الثورة

ولو انت مش فاهم حالة الاقتصاد بتاعتنا حاليا هتفهم من مقالاته كتير .. دا لو انت مش فاهم

طب ما تسأل وزير المالية بتاعك اللى هو عضو لجنة سياسات حزب وطنى ومستشار مالى لجمال مبارك .. وسايبه رايح يستلف مليار دولا ر من البنك الدولى .. عشان نفضل تابعين للغرب

أقولك .. انت خايف ع الاقتصاد اوى .. طب فين ال 1200 مليار جنيه اللى اتهربوا من البلد فى عهد حكومة شفيق تحت سمعك وبصرك ؟؟ أنت متخيل الرقم قد اى ؟؟ .. واتهربوا راحوا فين ؟؟؟ وشفيق مش بيتحاكم على دا لى ؟؟

13

الجيش بيستعمانا لانه مصمم يسيطر على الاعلام سواء كان حكومى او خاص .. البلد دى عمرها ما تتظبط الا لو الاعلام كان حر .. طول ما الاعلام موجه .. طول ما البلد بايظة .. طول ما انت بتلعب فى دماغ الشعب وتقضى على وعيه .. طبعا أنا عارف ان مسيطر على الاعلام دى .. يعنى التلميع والتشويه

البرادعى .. آه م البرادعى البعبع اللى بيطلع لكل لواءات المجلس فى الاحلام والكوابيس ؟؟ .. هو البرادعى ممكن ياخد مننا البلد .. ممكن يحكم .. ممكن يخليها مدنية بجد ؟؟ ممكن يقضى على سيطرة العسكر على البلد من أكتر من 60 سنة .. بيسأل على موازنة الجيش ؟؟ هى حصلت يابرادعى .. موازنة الجيش ؟؟

لا الراجل دا مش ممكن يمسك .. استحالة .. الاخوان فاكرين نفسهم أذكى مننا وهينتخبوا البرادعى وهما أصلا هيسيطروا على مجلس الشعب

يبقى الجيش يحط خطة عبقرية :

ـ شفيق يستقيل من رئاسة الوزرا قبل الانتخابات بشهرين يترشح ويكسب .. طب شفيق فلسع

ـ نلمع باقى المرشحين .. عندنا عمرو موسى .. شعبولا بيحبه وجمهور شعبولا بيحبه .. نزل عمرو موسى الشارع .. المقابلة مش تمام .. عملوا قياسات للراى العام .. الاسلاميين مش عايزينه

ـ السيطرة على الاعلام .. نشوه فى الراجل زى ما احنا عايزين " البرادعى لحد النهاردة ممنوع يظهر فى التلفزيون المصرى "

ـ نطلق عليه الجماعات الراديكالية .. يعنى اى دولة مدنية يا برادعى ؟ " يعنى أمك ما تلبسش حجاب "

ـ ننزل مرشحين اسلاميين .. الناس قى الشارع مش عبيطة .. مش هينتخبوا حد لان دقته أطول من التانى

يعنى حسان مينفعش ؟؟ لالا ما ينفعش

ـ عبد المنعم أبوالفتوح يترشح خلافا لجماعة الاخوان .. الاخوان مش هيدعموه .. فعلا ؟؟ .. ايوه والله مش تمويه ولا حاجة .. الاخوان اتعلموا من سيناريو الجزاير 1992 وغزة 2006

ـ طب مفيش مرشح اسلامى عليه توافق من الاخوان والراديكاليين والجهاديين .. آه فيه حد كويس .. د. محمد سليم العوا على شبه توافق .. وكده نضمن ان اصوات وحشد الاخوان ميكونش مع البرادعى أو ع الأقل نعمل تشتيت اصوات لمصلحة عمرو موسى

لو حد بيقرى وشايف ان اللى بقوله دا خيالات مريضة .. عايزه يحاول يقنعنى ان طنطاوى هيوافق ييجى مرشح ضد النظام السابق يحاكم كل دول وبلاويهم كتير .. الحل الوحيد انهم يجيبوا حد تبعهم ومعاهم شفيق أو عمرو موسى .. أو ينفذوا سيناريو الجزاير ويسيبوا الاسلاميين يوصلوا للحكم وبعدين يعملوا انقلاب عسكرى زى الفل دفاعا عن مدنية الدولة وحمايتها من الراديكاليين الذين يرعبون الداخل والخارج

والحقيقة ان الجيش بتاعتنا ما شاء الله عليه .. بيلعب على الخطتين بمنتهى الكفاءة

أنا الجيش استعمانى فى كل اللى قلته دا .. وطبعا ما خفى كان أعظم .. وأنا هنزل يوم 27 مايو أهتف ضد المجلس العسكرى .. هقوله مش أنا اللى اتقرطس فى ثورتى ..

أنت بتستعمانى يا جيش ؟؟ .. تقولى بحمى الثورة وانت بتسرقها ؟؟

كان المفروض اكتب التدوينة دى امبارح فى يوم التدوين ضد المجلس العسكرى .. بس اللى حصل بقى

ـ التدوينة دى اهداء للمناضل " النصرانى الكافر " مايكل نبيل اول من انتقد المجلس العسكرى ويدفع التمن الآن فى غياهب السجن العسكر