السقوط الكبير

إيه العنوان الفخيم اللي أنا اخترته للتدوينة ده ؟ .. هي أي هرتلة وخلاص ولا اى ؟ اى السقوط الكبير ده ؟؟؟؟


مش عشان لبست سنة يعنى الدنيا اتقلبت ... الحقيقة إنها فعلا اتقلبت .. او هي أصلا كانت مقلوبة وأنا مكنتش واخد بالى .. أصل مينفعش حد بظروفي دى تكون دى طريقة تفكيره الغبية اوى يعنى كده ... طبعا انتوا مش فاهمين اى حاجة.
هى الحكاية ببساطة انى طالب فاشل " كلكوا عارفين ده .. وللتأكد بص على الشريط يمين المدونة " ... بس مكنتش متخيل انى فاشل للدرجة دى .. لدرجة انى اشيل 6 مواد من أصل 7 .. " منهم واحدة أساسا شايلها من السنة اللى فاتت .. وهمتحنها السنة الجاية للمرة الخمسة ع التوالى المتوازى "  .. دى ولا فضيحة المونديال على فكرة .. صحيح المونديال كان صفر كبير .. انما دا حاجة تييييييت اوى ...


بس اللى ضايقنى فعلا مش انى ساقط وفاشل .. ولا انى ضيعت سنة من عمرى .. ولا انى هعيد السنة دى من اول وجديد .. وكأنك يابو زيد ما أكلت زيت " اى المثل ده ؟؟ " ...


 اللى ضايقنى فعلا فعلا .. انى مازعلتش ولا اتضايقت اطلالالالالالالالاقا .. لما شفت النتيجة .. اطلاقا  .. خالص ..  ابدا  .. ابسولوتلى والله ..


 بصيت ع النتيجة .. لقيتنى ساقط .. القيت نظرة عابرة على بقية النتايج علشان اتطمن على صحابى واتشفى فيهم  .. اشمعنى انا يعنى ؟؟ ... لقيتهم كلهم ناجحين وبتقديرات كمان .... قلت فى سرى " اللهم زيلها نعمة واحفظها من الدوام " ..


واتدورت ومشيت ولا حضرت محاضرات ولا كلمت حد خالص ...  " مش من الصدمة والله ... اكتشفت بعد كده انها حالة لامبالاة بوهيمية " ... بس كده .. وفات اسبوعين كاملين ولقيتنى دلوقتى ماسك ام اللاب ده وقاعد اكتب التدوينة دى ..  " توثيقا للخيبة القوية اللى أنا فيها "


بس الدنيا دى طلعت بنت كلب اوى وتستاهل ضرب الزنوبة ... آه والله بجد ... يعنى بقالى ستاشر سنة فى التعليم عمال انجح واجيب تقديرات  .... وفى الابتدائى والاعدادى كنت دايما الاول ع المحافظة .. لا وكمان وانا فى ثانوى اشارك فى مسابقة ثقافية على مستوى الجمهورية واخد المركز التانى ..


كل ده يحصل وميبقاش عندى لاب اكتب اسجل عليه الحاجات دى " ولا حتى قناة الجزيرة تيجى تسجل معايا  " .... ويوم ما يبقى عندى لاب ... اول ذكرى اكتبها عليه تبقى ذكرى سودة اوى كده ؟؟؟؟؟؟؟؟؟  اكتب انى ساقط  ... ساقط ساااااااااااااااااااااااااااااااااقط ؟؟؟؟؟؟؟ ..


طبعا واكيد الست الحاجة لسه محدش اداها خبر ... وانا عملت عبيط وقلت الثورة مبهدلة الكلية والدكاترة مش راضيين يعلنوا النتيجة خوفا من " حنق الطلبة الثوريين " ... وربنا يسهل بقى ... وقلتلها يعنى يا حاجة الثورة أهم طبعا .. مش مهم أنا أنجح ولا اتحرق بجاز ... وكفاية عليا انجازات السنة دى .. عملت ثورة .. وحدفت على الامن المركزى طوب .. وهو الشهادة لله رد لى الهدية وحدف عليا قنابل " مسيلة للدموع .. مسلية للجموع " .. وكمان رصاص مطاطى دفاعا عن المخلوع الواطى ... وكان فى رصاص حى وبيلعب كمان ... بس دا مكانش من نصيبى يعنى ... المهم أنا كمان مسكتش يا ماما .. قمت حدفت عليه قنابل مولوتوف ... " بلطجية الحزب الوطنى مش بيعرفوا ينطقوا مولوتوف بيقولوا عليها قنابل بلوتووووث ـ دى حقيقة والله " ... وبعدين يا ماما قعدت 18 يوم فى الشارع اشتم فى حسنى واتريق عليه لحد ما خليته فضيحة الامم ...


وبعدين كفاية اوى انى قدرت انا وشوية العيال السيس صحابى نحول مبارك من الرئيس الدلوع  الى الرئيس المخلوووووووووووووووووع ... وبقيت ساعات اظبط نفسى بدندن واقول الرئيس المخلوع .. الرئيس المخلوع .. الرئيس المخلوع


طب بالذمة مش دى انجازات اجدع من النجاح فى اى سنة دراسية من التعليم الأهطل بتاعنا ...ولا حتى انى اخد البكالوريا بذات نفسها ....  أنا بس اللى مزعلنى و" حازز فى نفسويتى "  انى متصورتش جنب الدبابة للاسف


بالنسبة بقى لاسباب الفشل الذريع دى فهى كتيييييير .. " لاحظ انى قلت اسباب وليست مبررات " .. صايع انا ومعايا رخصة معتمدة ومش هتقدر تمسك عليا فتفوتة .. أصل الفشل ملوش مبررات الحقيقة  .. واللى يحاول يبرر الفشل يبقى عيل أهطل وواطى .. واقل ما يقال عنه أنه يستحق الشفقة


أم هند " دى مش واحدة ست على فكرة .. دا تحوير مصرى اصلى لكلمة المهم " .. المهم أنا سقطت ليه ليه ليه ؟؟؟ .... لا بجد يعنى ليه ؟؟؟؟؟؟؟ .. طب وأنت مال مامتك ؟؟؟؟؟ ... الله .. الله .. الله بقى


هى الأسباب ببساطة تبدأ بإنى من البداية غلطت لما دخلت كلية مبحبهاش ... لمجرد أنى أرضى ناس معينة ... اكتشفت بعد كده انهم اول ناس اتخلوا عنى لما وقعت ... واساسا اتخلوا عنى فى وسط الطريق من بدرى جدا .. حتى ايام لما كنت بنجح ... أصلهم كانوا عاملين زى اللهو الخفى كده ... أو زى الشيطان ياخدك للمعصية وبعدين يقولك وانا مالى يا عم " إنى أخاف الله رب العالمين "


أكيد يعنى السبب ده هيفسرلك " أو هيفسرلى أنا ـ لأنى معتقدش إنك لسه مكمل معايا قراية التدوينة " .. هيفسر ليه أنا كنت مهمل فى مذاكرتى ومتابعتى لمحاضراتى وخلافه .. إلخ إلخ إلخ


حد نبيه بقى وصايع ... هيقولى طب ما انت بقالك 3 سنين بتنجح يا برنس الليالى فى نفس ذات الكلية دى اللى انت بسلامتك ما بتحبهاش ... أى بقى اللى حصل السنة دى ؟؟؟؟؟


عندى سبب : الملل .. أيون .. الملل ... المللللللل ... مليت أنا إنى أقعد أصم واحفظ حاجات مش فاهمها .. وأروح أرجعها فى ورقة الاجابة .. وأخرج ناسى كل حاجة ... عارف أنت إحساس فتاة الليل اللى ملت القرف ده لمجرد إنها بتعمل ده عشان تصرف على اخواتها الصغيريين ... ما يولعوا اخواتها .. المهم هى تحافظ على نفسها وتبقى محترمة على الاقل فى نظر نفسها


أنا بقى حاسس أنى طول ال3 سنين اللى فاتوا دول كنت بمارس نوع من " الدعارة التعليمية " ... اوعى تتصدم يا عم الحاج ... علشان كده أنا عاهدت نفسى .. إنى مش هعمل ده تانى ... مش همشى فى سكة البلحة المقمعة تانى ... مش هحفظ حاجة قبل ما افهمها .. ان شالله أقعد فى الكلية دى 40 سنة ... ع الأقل هبقى محترم  فى نظر نفسى.


عموما يعنى بغض النظر عن الرغى الكتير ده .. أنا والله متصالح مع نفسى جدا ... آها عارف انى مقصر ... بس كمان عارف اسباب تقصيري اى .. وأكيد يعنى أنا راضى بكل اللي ربنا يكتبه .. بس يارب لو سمحت ياريت من فضلك تكتب كل الحاجات الوحشة فى حياتى بقلم رصاص عشان يبقى سهل تتمسح .. اها يارب من اللى هــو السنون ده 5 مللى ... ومش لازم يكون قلم  " روترنج " ...  يعنى عشان انا عارف انه غالى .. لأنه ألماني بقى ... من عند العالم الكفرة دول اللي السلفيين بيقولوا عليهم " دا علماني متطرف " .. الا يا رب صحيح ؟ ... هما السلفيين دول جنس ملة اللي خلفهوهم أي ؟؟؟ .. يعنى هما بنى آدمين زينا يعنى ؟؟؟؟
ـــــــــــــــــــــــــــ
يقول كونفوشيوس : " ابق وجهك فى اتجاه الشمس .. ولن ترى الظلال أبدااا "